BRUKSEL, 7 Tetor 2026 – Vendet anëtare të Bashkimit Evropian nuk kanë arritur ende një konsensus për mbylljen e përkohshme të Kapitullit 20 të negociatave të anëtarësimit me Shqipërinë, pas diskutimeve të zhvilluara në grupin e punës të Këshillit të BE-së për Zgjerimin (COELA).

Përfaqësuesit e vendeve anëtare do t’i rikthehen sot bisedimeve në COELA për të shqyrtuar një propozim kompromisi të paraqitur nga Presidenca e Këshillit të BE-së, me synim hartimin e një pozicioni të përbashkët. Kapitulli 20 mbulon fushat e “Sipërmarrjes dhe Politikës Industriale” dhe bën pjesë në Grup-kapitullin 3, “Konkurrueshmëria dhe rritja gjithëpërfshirëse”.

Mungesa e dakordësisë pezullon përkohësisht hapat e mëtejshëm proceduralë. Në rast se vendet anëtare arrijnë miratimin në COELA, dosja duhet t’i kalojë Komitetit të Përfaqësuesve të Përhershëm (COREPER) përpara se mbyllja e kapitullit të formalizohet zyrtarisht në një Konferencë Ndërqeveritare BE–Shqipëri, e cila është përfolur se mund të zhvillohet më 13 tetor.