TIRANË – Historia e 22-vjeçarit Orgito Baraj dëshmon se pasioni për teknologjinë dhe talenti i hershëm mund të kthehen në një sipërmarrje të suksesshme. I ftuar në emisionin “Tech Talk”, ai ka ndarë rrugëtimin e tij nga Ballshi deri në drejtimin e një kompanie software-i që numëron 16 punonjës.

I rritur në Ballsh me mundësi të kufizuara teknologjike, Baraj nisi të eksploronte kompjuterët falë pajisjes së parë që i dhuruan prindërit. Më pas, gjatë zhvendosjes në Fier, një rol kyç pati mësuesja e informatikës, Olta, e cila ishte ndër të parat që besoi te potenciali i tij, pavarësisht se në lëndët e tjera nuk shkëlqente.

Krijimi i startup-it dhe të ardhurat milionëshe

Që në moshën 15-vjeçare, Baraj nisi të krijonte produkte teknologjike dhe të eksperimentonte me kriptomonedhat. Një nga pikat e kthesës ishte krijimi i një startup-i në fushën e inteligjencës artificiale, të cilin ai tregon se e ka shitur për 80 mijë euro.

Sot, në moshën 22-vjeçare, ai drejton kompaninë e tij të softuerit me 16 të punësuar, ndërsa sipas të dhënave, aktiviteti i biznesit ka gjeneruar rreth 1.4 milionë euro të ardhura që nga viti 2023.