TIRANË – Gjykata e Posaçme e Apelit ka lënë në fuqi vendimin e shkallës së parë për 16 të pandehurit e dosjes së skemës së mashtrimit përmes call-center-ave të drejtuar nga Bruno Çobo, duke dënuar përfundimisht me 6 vite e 8 muaj burgim operatoren Greta Gjoci (Pepa).

Vendimi, i shpallur më 5 tetor 2026, ka sjellë hapjen e një beteje të re ligjore nga ana e mbrojtjes, e cila nuk keksion pafajësinë, por shtyrjen e ekzekutimit të dënimit për shkak të rrethanave familjare.

Kërkesa e mbrojtjes dhe situata ligjore

Sipas burimeve, Greta Gjoci është nënë e një foshnjeje vetëm 4-muajshe. Duke iu referuar nenit 476, pika 1, shkronja “b” të Kodit të Procedurës Penale, e cila parashikon shtyrjen e ekzekutimit për gratë e dënuara që janë shtatzënë ose kanë fëmijë nën moshën një vjeç, avokati i saj i është drejtuar gjykatës më 5 tetor me kërkesën për shtyrjen e vendimit.

Mbrojtja thekson se beteja aktuale nuk lidhet me ndryshimin e dënimit apo fajësinë, por me mënyrën dhe momentin e vuajtjes së tij, duke kërkuar marrjen parasysh të moshës së foshnjës. Pavarësisht kësaj, Gjoci është shoqëruar drejt institucionit të vuajtjes së dënimit së bashku me foshnjën e saj.

Detaje nga dosja penale

Në shkallë të parë, përmes vendimit të datës 27 tetor 2025, Gjykata e Posaçme e deklaroi atë fajtore për “mashtrim kompjuterik në bashkëpunim” në kuadër të grupit të strukturuar kriminal, duke caktuar pas uljes së gjykimit të shkurtuar dënimin përfundimtar prej 6 vitesh e 8 muajsh.

Sipas hetimeve të dosjes që përfshin 16 të pandehur dhe dëme ndaj shtetasve italianë, dënimi më i lartë prej 8 vitesh iu dha drejtuesit të grupit Bruno Çobo, ndërsa Gjoci ka shërbyer si operatore dhe jeton prej vitesh me qira. Me lënien në fuqi të vendimit nga Apeli, çështja ka hapur debat publik lidhur me kushtet e ekzekutimit të dënimeve për nënat me foshnja të mitura.