BRUKSEL – Mali i Zi mund të bëhet anëtari i 28-të i Bashkimit Evropian brenda vitit 2028, pasi Komisionerja evropiane për Zgjerim, Marta Kos, ka paralajmëruar mundësinë e nënshkrimit të traktatit të anëtarësimit gjatë verës së ardhshme.

Gjatë një paraqitjeje para Komitetit për Punë të Jashtme të Parlamentit Evropian (AFET), Kos ka bërë të ditur se pjesa teknike e negociatave mund të përfundojë brenda këtij viti ose në fillim të vitit të ardhshëm, ndërkohë që Komisioni ka nisur përgatitjen e traktatit të anëtarësimit.

Procesi i ratifikimit dhe afatet

Sipas komisioneres evropiane, pas nënshkimit verën e ardhshme, do të pasojë procesi i ratifikimit, i cili llogaritet të zgjasë nga një deri në dy vjet në varësi të vendeve anëtare. Kjo dinamikë krijon hapësirë që Mali i Zi të zyrtarizohet si anëtari më i ri i bllokut evropian në vitin 2028.

Mali i Zi mbetet vendi kandidat më i avancuar në rajon, duke pasur të mbyllur përkohësisht 18 nga 33 kapitujt e negociatave, ndërsa synon mbylljen e plotë të tyre deri në fund të këtij viti. Ky shtet pritet të jetë gjithashtu i pari që do t’i nënshtrohet rregullave të reja të Komisionit Evropian për vendet e ardhshme anëtare.

Samiti i BE-së dhe Shqipëria në fokus

Çështja e zgjerimit do të dominojë punimet e samitit të krerëve të shteteve dhe qeverive të BE-së, i cili do të zhvillohet më 15 dhe 16 tetor në Bruksel, ku liderët do të shqyrtojnë progresin e Podgoricës zyrtare.

Ndërkohë, në fund të muajit tetor, Komisioni Evropian do të publikojë udhërrëfyesit kuadër edhe për Shqipërinë, Moldavinë dhe Ukrainën, si vendet e tjera më të avancuara në këtë proces, me kushtin parësor ruajtjen e ritmit të reformave.