ATHINË – Një aktivitet i shtuar sizmik është regjistruar në Greqi gjatë orëve të fundit, ku një tërmet me magnitudë 3.7 ballë të shkallës Rihter ka goditur zonën detare pranë ishullit të Kasosit.

Sipas të dhënave të rishikuara nga Instituti Gjeodinamik, lëkundja kryesore është regjistruar në orën 11:16, me një thellësi fokale prej 7.6 kilometrash dhe epiqendër rreth 30 kilometra në perëndim të Kasosit.

Seria e lëkundjeve gjatë natës

Ky tërmet vjen pas një sere aktivitetesh sizmike që kanë përfshirë të njëjtën zonë gjatë natës dhe orëve të para të mëngjesit. Që nga mesnata e deri në orën 10:27, janë regjistruar tetë tërmete të tjera, me magnituda që kanë osciluar nga 2.4 deri në 4.1 ballë të shkallës Rihter.

Goditja më e fortë e kësaj serie u shënua në orën 02:43 me magnitudë 4.1 ballë, e ndjekur pak minuta më vonë nga një tjetër lëkundje prej 3.9 ballësh. Pas tyre janë pasuar katër lëkundje më të dobëta, si dhe një tjetër tërmet prej 3.2 ballësh i regjistruar në orën 10:27.

Situata në terren

Deri në këto momente, autoritetet bëjnë me dije se lëkundjet janë ndjerë shumë pak nga banorët e zonës. Ndërkohë, nuk ka asnjë raportim zyrtar për dëme materiale apo persona të lënduar, ndërsa strukturat përkatëse po monitorojnë situatën sizmologjike.