Paris, 7 tetor 2026 – Një moment i veçantë është regjistruar gjatë protestave të nxënësve dhe studentëve në Francë, ku kryebashkiaku i Saint-Denis, Bally Bagayoko, është parë në mes të protestuesve dhe forcave të policisë, në përpjekje për të ulur tensionet.

Bagayoko ka qenë i pranishëm në disa prej protestave që kanë përfshirë institucionet arsimore në Francë. Gjatë një prej episodeve të fundit, ai është vendosur përpara një grupi të rinjsh, duke tentuar të ndërmjetësojë dhe të shmangë përplasjen e drejtpërdrejtë me policinë.

Protestat janë përhapur në të gjithë vendin dhe janë shoqëruar në disa raste me përplasje mes demonstruesve dhe forcave të rendit. Protestuesit kërkojnë më shumë investime në arsim, duke ngritur shqetësime për mungesën e mësuesve, mbipopullimin e klasave dhe gjendjen e infrastrukturës shkollore.

Bagayoko, kryebashkiak i Saint-Denis dhe përfaqësues i La France Insoumise, ka kërkuar publikisht uljen e tensioneve dhe një përgjigje politike ndaj kërkesave të të rinjve. Më 6 tetor, gjatë një proteste në Paris, ai u prek edhe nga gazi lotsjellës i përdorur nga policia dhe bëri thirrje për hapjen e negociatave me përfaqësuesit e nxënësve.

Përfshirja e tij në protestat e nxënësve ka shkaktuar edhe debate politike në Francë. Autoritetet e kanë kritikuar për qëndrimet dhe praninë e tij në bllokimet e shkollave, ndërsa prefekti i policisë së Parisit i është drejtuar drejtësisë me një kallëzim lidhur me dyshimet për nxitje të kryerjes së një vepre penale.

Ndërkohë, protestat studentore dhe të nxënësve kanë hyrë në një fazë të tensionuar, me përplasje të raportuara në disa qytete. Autoritetet franceze kanë shtuar praninë policore, ndërsa qeveria po përballet me presion për t’iu përgjigjur kërkesave për përmirësimin e kushteve në sistemin arsimor.

Bally Bagayoko tente de calmerla tension lors de la manifestation lycéenne et étudiante à Paris. pic.twitter.com/rbg45G7yu6

— Enzo Rabouy (@enzorabouyy) October 6, 2026