Ndryshojnë çmimet e karburanteve, nafta 210 lekë dhe benzina 190 lekë për litër, vendimi hyn në fuqi sot

Bordi i Transparencës dhe Kufizimit të Përkohshëm të Çmimeve të tregtimit me shumicë dhe pakicë të nënprodukteve të naftës dhe gazit ka përcaktuar çmimet e reja të karburanteve në vend.

Në mbledhjen e dytë, të zhvilluar këtë të mërkurë, 7 tetor 2026, Bordi vendosi që çmimi maksimal i shitjes me pakicë të gazoilit të jetë 210 lekë për litër, ndërsa në shitjen me shumicë jo më shumë se 198 lekë për litër.

Për benzinën, çmimi maksimal i shitjes me pakicë është caktuar në 190 lekë për litër, ndërsa çmimi me shumicë nuk duhet të kalojë 178 lekë për litër.

Çmimet e reja hyjnë në fuqi sot, më 7 tetor, në orën 11:30, dhe do të mbeten në fuqi deri në mbledhjen e ardhshme të Bordit, kur do të pasqyrohen ndryshimet e mundshme në treg.

Bordi paralajmëroi të gjithë operatorët e tregtimit me shumicë dhe pakicë se zbatimi i vendimit është i detyrueshëm.

Në rast të konstatimit të shkeljeve, ndaj operatorëve parashikohet pezullimi i aktivitetit.

Vendimi është marrë në kuadër të masave të vendosura pas shpalljes së situatës së veçantë në tregun e hidrokarbureve.