Presidentja e re e Kosovës mori zyrtarisht detyrën para Kuvendit dhe premtoi unitet, drejtësi, forcim të institucioneve dhe orientim të qartë euroatlantik

Justina Shiroka-Pula ka bërë betimin para deputetëve të Kuvendit të Kosovës, duke marrë zyrtarisht detyrën e Presidentes së Republikës.

Gjatë betimit, ajo u zotua se do të angazhohet për mbrojtjen e sovranitetit, integritetit territorial dhe rendit kushtetues të Kosovës.

Në fjalën e parë pas marrjes së detyrës, Shiroka-Pula tha se e pranon mandatin me nder të madh dhe përgjegjësi të plotë, duke theksuar se Presidenca nuk i përket vetëm një personi, por qytetarëve dhe institucioneve të shtetit.

“Ky mandat nuk i përket vetëm një personi. Ai i përket qytetarëve tanë, institucioneve tona dhe shtetit për të cilin shumë breza u sakrifikuan”, deklaroi ajo.

Presidentja e re u zotua se do të jetë presidente e të gjithë qytetarëve, pa dallime politike, etnike apo shoqërore.

Ajo theksoi se gjatë mandatit të saj do të punojë për unitet, drejtësi, zhvillim dhe forcimin e institucioneve të Kosovës.

Shiroka-Pula nënvizoi gjithashtu orientimin euroatlantik të vendit dhe rëndësinë e ruajtjes së marrëdhënieve të forta me aleatët ndërkombëtarë.

“Kosova duhet të ecë përpara si një shtet demokratik, i sigurt, me orientim të qartë euroatlantik dhe me miqësi të fortë me aleatët tanë”, tha ajo.

Në përfundim të fjalës, Presidentja deklaroi se do të mbrojë Kushtetutën, interesin e Republikës dhe dinjitetin e qytetarëve, duke e mbyllur me fjalët: “Zoti e bekoftë Republikën e Kosovës!”. /noa.al