TIRANË – Gjykata e Tiranës ka caktuar masën e sigurisë “Arrest në burg” për shtetasin Ardian Muka, banor i fshatit Gërdec në Vorë, i cili akuzohet se i ka vënë një gjobë prej 300 mijë eurosh kushëririt të tij, Erion Muka, duke e kërcënuar atë me jetë.

Ngjarja u zbulua më 12 shtator 2026, kur Erion Muka gjeti te porta e jashtme e oborrit të shtëpisë një kuti syzesh brenda së cilës ndodhej një fishek automatiku dhe një letër me mesazhe kërcënuese që i kërkonte shumën e madhe të parave. Materialet u dorëzuan menjëherë në Komisariatin Nr. 7 në Vorë.

Hetimet e drejtuara nga prokurori Petrit Vukaj fillimisht u përqendruan te dyshimet për një histori sentimentale, por këqyrja e pamjeve filmike dhe veprimet operative zbuluan se autori ishte kushëriri i tij, Ardian Muka.

Gjatë marrjes në pyetje pas shoqërimit, i arrestuari e ka pranuar autorsinë e krimit, duke deklaruar se natën e 11 shtatorit u vesh me kominoshe pune për të mos u identifikuar, vendosi letrën dhe fishekun në kutinë e syzeve dhe e la te dera e kushëririt përpara se të largohej.

Gjatë kontrollit në shtëpinë e autorit, policia sekuestroi kominoshet e punës, një laps dhe një fletore ku dyshohet se është shkruar letra kërcënuese. Ardian Muka përballet me akuzat për “Shtrëngim me anë të kanosjes për marrjen e pasurisë” dhe “Mbajtje pa leje e municioneve”.