LEZHË – Kryetari i Partisë Demokratike, Sali Berisha, zhvilloi këtë të martë në qytetin e Lezhës “Foltorën e Ripërtëritjes”, ku theksoi se opozita ka përmbushur me dinjitet misionin e saj të qëndresës dhe se tashmë ka ardhur koha për një tjetër objektiv kombëtar: largimin e qeverisë dhe ripërtëritjen e vendit.

Gjatë fjalës së tij para mbështetësve dhe strukturave të PD-së të qarkut të Lezhës — përfshirë degët e Kurbinit dhe Mirditës, si dhe në prani të drejtuesit politik Gjin Gjoni — Berisha vlerësoi rezistencën e anëtarësisë gjatë viteve të kaluara:

“Ne kemi ardhur në këtë moment pas një rruge të vështirë e të dhimbshme, por njëkohësisht ndoshta rrugës më dinjitoze të jetës tonë politike. Ne qëndruam të pamposhtur jo për interesa personale apo familjare, por për idealet më fisnike, dinjitetin njerëzor dhe besimin se Shqipëria duhet të ketë një opozitë të vërtetë e sovrane.”

Lidhur me sfidat e sotme, kreu i PD-së u ndal te problematikat ekonomike e sociale, duke akuzuar pushtetin se po çon drejt skajshmërisë shtresat më të ndjeshme të shoqërisë:

“Koha na thërret të ripërtërijmë Shqipërinë. Sot janë me qindra mijëra pensionistë që për shkak të rritjes së çmimeve nuk sigurojnë dot ushqimin e mjaftueshëm për më shumë se dy javë në muaj dhe nuk marrin dot ilaçet për t’u mjekuar. Kjo situatë i ngjan diktaturës, ku pamundësia për të blerë mjekimet shkurton çdo ditë jetën e tyre.”

Berisha mori në analizë edhe emigrimin e rinive, duke sjellë si shembull koston e lartë të jetesës dhe pamundësinë e të diplomuarve për të krijuar familje në vend:

“I riu sot mbaron universitetin dhe përballet me çmime e qira që e kalojnë rrogën mesatare, ku qiraja në Tiranë arrin deri në 720 euro. Para kësaj pamundësie, të rinjtë detyrohen të marrin ëndrrën me vete e të largohen jashtë vendit.”