Tiranë, 6 tetor 2026 – Masa të shtuara sigurie janë ndërmarrë në ambientet e Gjykatës së Posaçme kundër Korrupsionit dhe Krimit të Organizuar (GJKKO), ku Garda e Republikës ka kryer kontrolle të detajuara të disa pajisjeve të mbërritura në godinën e gjykatës.

Verifikimet janë kryer përpara përdorimit të pajisjeve, në kuadër të procedurave të sigurisë që zbatohen në ambientet e GJKKO-së.

Gjatë kontrolleve është përdorur edhe një qen i trajnuar për identifikimin e lëndëve apo materialeve të dyshuara, me qëllim verifikimin e pranisë së mundshme të sendeve të ndaluara.

Kontrollet e kryera nga strukturat e Gardës janë pjesë e masave parandaluese të sigurisë, të cilat synojnë evidentimin në kohë të çdo rreziku të mundshëm dhe garantimin e zhvillimit normal dhe të sigurt të proceseve gjyqësore.

Për momentin, nuk raportohet për ndonjë incident apo kërcënim konkret të evidentuar gjatë kontrolleve.

Pamjet: Kontrollet e Gardës së Republikës në ambientet e GJKKO-së.