KURBIN — Një ngjarje e rëndë është regjistruar në orët e para të mëngjesit të së martës në Milot të rrethit të Kurbinit, ku janë djegur disa mjete të rënda dhe është dhunuar roja i një subjekti privat.

Sipas të dhënave paraprake nga policia, ngjarja ka ndodhur rreth orës 01:40 në një pikë për përpunimin e inerteve në administrim të shtetasit K.B. Persona ende të paidentifikuar kanë djegur plotësisht 4 kamionë dhe 1 ekskavator që ndodheshin brenda territorit të subjektit.

Gjatë ngjarjes ka mbetur i dëmtuar edhe roja i objektit, shtetasi M.M., 60 vjeç, i cili është paraqitur në spital me dëmtime fizike në pjesën e fytyrës.

Grupi hetimor, nën drejtimin e Prokurorisë, po vijon veprimet hetimore dhe procedurale në vendngjarje me qëllim zbardhjen e plotë të rrethanave, identifikimin dhe kapjen e autorëve të dyshuar.