KALBE — Një kontroll rutinë i patrullave të policisë në qytetin Kalbe të Gjermanisë ka çuar në zbulimin e një plantacioni të madh kanabisi me rreth 800 bimë, si dhe në arrestimin e dy shtetasve shqiptarë të moshës 32 dhe 56 vjeç.

Gjatë patrullimit në rrugën "Breiten Weg" pasditen e 2 tetorit, efektivët vërejtën një erë të fortë kanabisi që vinte nga brenda një godine të pabanuar. Ndërhyrja e menjëhershme e policisë zbuloi sasinë e madhe të bimëve narkotike në faza të ndryshme rritjeje, si dhe praninë e dy shqiptarëve brenda ambienteve.

Të arrestuarit dolën para gjykatës më 3 tetor me kërkesë të Prokurorisë së Stendalit, e cila caktoi masën e sigurisë "arrest me burg" për të dy të dyshuarit.

Hetimet nga autoritetet gjermane vijojnë për zbardhjen e plotë të rrjetit dhe rolit të të arrestuarve në këtë veprimtari kriminale.