TIRANË — Policia e Shtetit ka hartuar një plan masash për garantimin e rendit dhe sigurisë publike për ndeshjen midis Shqipërisë dhe San Marinos, e vlefshme për Ligën e Kombeve, e cila zhvillohet ditën e sotme në orën 20:45 në Arenën Kombëtare.

Për mbarëvajtjen e aktivitetit sportiv dhe lehtësimin e trafikut, nga ora 17:00 deri në përfundim të takimit do të aplikohen kufizime dhe bllokime të qarkullimit të automjeteve në akset pranë stadiumit.

Rrugët ku do të ndalohet lëvizja përfshijnë:

Bulevardin "Dëshmorët e Kombit": Nga urë e ish-Hotel Dajtit.

Rrugën "Papa Gjon Pali II": Te kryqëzimi i RTSH-së.

Rrugët "Dervish Hima" dhe "Asim Zeneli": Pranë Ambasadës së SHBA-së.

Rrugën "Themistokli Gërmenji": Në hyrje të saj.

Rrugën "Ismail Qemali": Te kryqëzimi i RTSH-së.

Rrugën "Lekë Dukagjini": Pranë ish-Gardës së Republikës, e cila do të shërbejë vetëm si korridor hyrës për mjetet e autorizuara nga FSHF-ja.

Rrugën "Abdyl Frashëri": Pranë kryqëzimit të Librit Universitar.

Sheshin "Willson": Ku lëvizja do të devijohet drejt rrugës "Sami Frashëri" pak para përfundimit të ndeshjes.

Akset kryesore si Rruga e Elbasanit, Unaza dhe bulevardi "Bajram Curri" do të mbeten të lira për qarkullimin e mjeteve.

Sipas njoftimit zyrtar, punonjësit e policisë do të kryejnë kontrolle të imtësishme te hyrjet e stadiumit për të parandaluar futjen e lëndëve piroteknike, banderolave me përmbajtje raciste, monedhave, çadrave, çakmakëve, karikuesve apo sendeve të tjera të forta.

Portat e "Air Albania" do të hapen në orën 18:30, ndërsa autoritetet i kanë bërë thirrje tifozëve të paraqiten herët për të shmangur vonesat nga fluksi.