TIRANË – Banka e Shqipërisë ka hartuar projekt-rregulloren për funksionimin e sistemit të ri të pagesave të menjëhershme (Instant Payments), i cili do të lejoje kryerjen e transfertave kombëtare pothuajse në kohë reale — brenda një kohe maksimale prej 10 sekondash — për shumat deri në 500 mijë lekë ose 5 000 euro.

Sistemi i ri do të funksionojë pa ndërprerje 24 orë në ditë dhe 7 ditë të javës (24/7), duke shmangur vonesat aktuale të sistemit AECH dhe AIP Euro, ku transfertat kërkojnë disa orë pune ose shtyhen për ditën pasardhëse nëse nisen pas orës 13:45.

Projekt-rregullorja përcakton gjithashtu tavanet e komisioneve që bankat dhe institucionet financiare mund t’u aplikojnë klientëve:

Deri në 40 000 lekë: Transfertat do të jenë pa asnjë komision (0 lekë).

Nga 40 000 deri në 1 000 000 lekë: Komisioni maksimal nuk mund të kalojë 100 lekë (dhe jo më shumë se 50 lekë nëse kryhet përmes internet banking).

Për të nxitur aplikimin e tarifa sa më të ulëta nga bankat, Banka e Shqipërisë do të procedojë me komisione simbolike: zero lekë për transaksionet deri në 40 mijë lekë dhe vetëm 1 lek për ato mbi këtë vlerë.

Një tjetër ndryshim kyç në kuadrin rregullator është përfshirja si pjesëmarrës direkt në sistemet kombëtare të pagesave (AIPS dhe AIPS EURO) e institucioneve financiare jo-banka (institucionet e pagesave dhe parasë elektronike). Kjo u mundëson operatorëve jo-bankarë të ofrojnë shërbime me të njëjtat kushte e lehtësi si bankat tregtare, në kuadër të zbatimit të Direktivës Evropiane të Pagesave (PSD 2).