Kreu i Komisionit për Reformën Territoriale, Arbjan Mazniku, ka deklaruar se mazhoranca synon që reforma e re territoriale të zbatohet që në zgjedhjet e vitit 2027, duke argumentuar se shtyrja e saj për vitin 2031 do të sillte pasoja në përfitimin e fondeve europiane nga bashkitë.

I ftuar në emisionin “Now” në Euronews Albania, Mazniku tha se reforma është diskutuar prej kohësh dhe se mazhoranca, që në nisje të procesit, ka synuar përfshirjen e opozitës.

“Që në momentin që është nisur reforma, e kemi bërë të qartë se objektivi ynë primar ishte të gjenim mënyrën se si ta bënim këtë gjë bashkë me opozitën, me një mundësi që kjo reformë të ishte e dakordësuar me të gjitha palët”, u shpreh ai.

Mazniku theksoi se opozitës, sipas tij, i janë dhënë garanci për përfshirje në proces, duke përmendur paritetin në komision dhe bashkëkryesinë.

Sipas tij, procesi është vonuar për shkak të mungesës së opozitës në fazën fillestare të punës së komisionit.

“Mandati origjinal i komisionit ishte 275 ditë. Mbledhja e parë ndodhi ditën e 120-të, pra 120 nga 275 u humbën nga mosardhja e opozitës në fillim në komision”, deklaroi Mazniku.

Ai nënvizoi se më pas komisioni zhvilloi dëgjesa në 11 qarqe, ku u evidentuan problematikat e bashkive dhe mënyrat se si mund të përmirësohet funksionimi i tyre.

Një nga argumentet kryesore të Maznikut lidhet me afatin e zbatimit të reformës. Sipas tij, ndryshimet duhet të hyjnë në fuqi për zgjedhjet e vitit 2027 dhe jo të shtyhen për 2031.

“Propozimi ynë që në fillim është se na duhet ta bëjmë këtë reformë për ’27-ën, për një arsye që lidhet ngushtësisht me Bashkimin Europian”, tha ai.

Mazniku argumentoi se forcimi i bashkive lidhet edhe me kapacitetin e tyre për të përfituar fondet e Bashkimit Europian.

“Ne, si një vend anëtar në 2029-2030 me procesin që kemi sot, do të aksesojmë një ndër programet më të rëndësishme të Bashkimit Europian, që është programi i kohezionit social. Ai është i lidhur ngushtësisht me kapacitetin e bashkive për të përthithur fonde dhe për të pasur projekte të gatshme për të përthithur fonde në territorin e tyre”, deklaroi ai.

Sipas Maznikut, shtyrja e reformës për vitin 2031 do të sillte një periudhë të gjatë përshtatjeje dhe do të vononte efektet konkrete të saj.

“Në qoftë se ne e shtyjmë reformën për 2031-shin, katërvjeçari i parë në çdo rast është një katërvjeçar rregullimi, pra që duhet të rregullohen territoret brenda sipërfaqes së re. Do të thotë që kjo reformë efektet e mirëfillta të saj do t’i ndiente në 2035-ën”, tha Mazniku.

Ai shtoi se, sipas tij, Shqipëria do të humbiste një periudhë të konsiderueshme në përfitimin e financimeve europiane.

“Ne nuk humbasim katër vjet apo dy muaj, humbasim në fakt tetë vjet nga mundësia që bashkitë tona të përthithin më shumë financime nga Bashkimi Europian”, u shpreh ai, duke iu referuar edhe rasteve të Kroacisë dhe Polonisë.

I pyetur për reformën territoriale të vitit 2014 dhe nëse ndryshimet e reja janë një përpjekje për të korrigjuar atë që nuk funksionoi, Mazniku kundërshtoi termin “dështim”.

“Jo, nuk është dështim. Së pari, sepse çështja është që ato përpara bënin dy funksione apo tre funksione. Ne kemi shkuar nga tre-katër funksione në 10, 12, 15 funksione. Synimi ynë është të shkojmë në 32 funksione”, deklaroi ai.

Sipas tij, problemi kryesor lidhet me kapacitetet financiare dhe njerëzore të bashkive të vogla për të përmbushur të gjitha përgjegjësitë që u ngarkon ligji.

“Një bashki e cila totalin e të ardhurave të veta e ka 72 mijë euro në vit, siç është bashkia e Libohovës, nuk ia del dot t’i bëjë këto funksione në terma praktikë”, tha Mazniku.

Ai argumentoi se bashkimi me një bashki më të madhe do të krijonte mundësi për më shumë shërbime dhe buxhete më të mëdha.

“Ne kemi arritur të gjejmë një linjë të mesme shumë të mirë midis bashkimit. Asnjë bashki nuk shkrihet e asnjë bashki nuk ikën. Bashkimi i një territori më të madh bëhet për të ofruar më shumë shërbime, për të pasur një buxhet më të madh dhe mundësinë e përfaqësimit”, u shpreh ai.

Sa i përket kritikave se mazhoranca po e kalon reformën në mënyrë të njëanshme, Mazniku i hodhi poshtë akuzat për arrogancë dhe mungesë dialogu.

“Nuk bie dakord me dy elementët: të shurdhërisë dhe të arrogancës, sepse, me thënë të drejtën, nuk e kam parë në asnjë moment në këtë proces. E kundërta është e vërtetë”, deklaroi ai.

Mazniku argumentoi se mazhoranca e ka bërë të qartë që në fillim se synonte reduktimin e numrit të bashkive dhe se kjo ka qenë pika e nisjes së negociatave.

“Mazhoranca kishte 84 vota, vendos në tavolinë një reformë dhe thotë: ‘Ne synojmë më pak bashki’. Kjo nuk ka qenë një gjë e fshehur, ka qenë e qartë që ditën e parë”, tha ai.

Sipas tij, çështja nuk duhet parë vetëm nga këndvështrimi i konsensusit politik, por nga efekti që reforma synon të ketë te qytetarët.

“Parimi nuk është qëllimi konsensualiteti, synimi është si bëhet jeta më e mirë e qytetarëve. Nuk është qëllim në vete të arrijmë konsolidimin thjesht të kënaqet opozita”, deklaroi Mazniku.

Ai shtoi se mazhoranca e lidh mandatin e saj me votat e marra në zgjedhje.

“Ne flasim në emër të atyre njerëzve që kanë votuar për ne, që qëllon që janë mjaftueshëm njerëz që të kemi një mandat me 84 vota”, u shpreh kreu i Komisionit të Reformës Territoriale.

Reforma territoriale pritet të votohet në seancën plenare të së enjtes, më 8 tetor. Mazhoranca ka deklaruar se synon miratimin e hartës së re me 46 bashki.