PRISHTINË – Situata para Kuvendit të Kosovës është përshkallëzuar mbrëmjen e kësaj të hëne, ku Policia e Kosovës ka përdorur gaz lotsjellës për të shpërndarë protestuesit.

Ndërhyrja e forcave të rendit erdhi pasi pjesëmarrësit në protestë hodhën fishekzjarre dhe mjete të tjera piroteknike në drejtim të ndërtesës së Kuvendit, ku si pasojë u thyer edhe disa xhama të objektit.

Në vendngjarje është vënë re një rritje e menjëhershme e pranisë së forcave policore për të mbajtur nën kontroll perimetrin e sigurisë. Lidhura me përplasjen, një nga organizatorët e protestës, Çlirim Haziri, deklaroi:

“Zyrtarët policorë po i nënshtrohen Albin Kurtit. Deputetët do të dalin nga Kuvendi vetëm mbi trupat tanë.”

Tensionet e mbrëmjes vijojnë pas incidenteve të shënuara më herët gjatë ditës, ku protestuesit ndaluan fizikisht deputetin e Lëvizjes Vetëvendosje, Fahrush Rexhepi, duke e kthyer atë me forcë brenda rrethojave të Kuvendit për të parandaluar largimin e ligjvënësve pa votuar në lexim të dytë ndryshimet në Ligjin për Dhomat e Specializuara.