PRISHTINË – Momente tensioni janë shënuar përpara ndërtesës së Kuvendit të Kosovës, ku protestuesit e grumbulluar kanë ndaluar fizikisht deputetin e Lëvizjes Vetëvendosje, Fahrush Rexhepi, teksa po tentonte të largohej nga objekti parlamentar.

Protestuesit e kanë kapur deputetin dhe e kanë kthyer atë mbrapsht brenda rrethojave të sigurisë të vendosura nga Policia e Kosovës, duke mos e lejuar të vijonte rrugën e tij jashtë hapësirës së rrethuar.

Incidenti ndodhi gjatë zhvillimit të protestës përpara Kuvendit, ku pjesëmarrësit po ushtrojnë presion ndaj ligjvënësve me kërkesën që të mos e braktisin seancën pa votuar në lexim të dytë ndryshimet në Ligjin për Dhomat e Specializuara.