Forcat e Armatosura të Republikës së Shqipërisë kanë shpallur zyrtarisht rikthimin, pas më shumë se tri dekadash, të rezervistëve në stërvitje të rregullt ushtarake.

Shefi i Shtabit të Përgjithshëm të FARSH-së, gjenerallejtënant Arben Kingji, tha se ky proces merr një rëndësi të veçantë në kushtet e mjedisit të sotëm të sigurisë, të karakterizuar nga zhvillime dinamike, kërcënime hibride dhe kibernetike, si dhe nga nevoja për kapacitete të shtuara për përballimin e emergjencave civile.

Në këtë kuadër, gatishmëria nuk duhet të kufizohet vetëm te reagimi i parë, por duhet të sigurojë edhe aftësinë për të përforcuar dhe rigjeneruar forcën, duke garantuar vijimësinë e mbrojtjes kombëtare në situata të zgjatura krizash kombëtare, tha ai dhe shtoi:

“Rezerva nuk ndërtohet kur fillon kriza. Ajo përgatitet në kohë paqeje, që të jetë gati kur vendi e kërkon…”, u shpreh SHSHPFA, duke theksuar se rezerva duhet të stërvitet dhe integrohet në mënyrë të vazhdueshme me forcën aktive.

Rezervistët do të ndjekin një cikël progresiv trajnimi, nga stërvitja individuale dhe e avancuar, te stërvitja kolektive dhe integrimi me njësinë ku janë caktuar.

Procesi, u shpreh ai, mbështetet edhe nga përmirësimi i paketës ligjore për shërbimin ushtarak rezervist, e cila përcakton aktivizimin, të drejtat dhe detyrimet e rezervistëve, duke garantuar trajtim të njëjtë me ushtarakët aktivë gjatë periudhës së shërbimit dhe stërvitjes.

Një nga objektivat e përcaktuara deri në vitin 2029 është të trajtohet dhe integrohet mbi 80% e rezervës.

Më herët, Qendra e Personel Rekrutimit kreu regjistrimin e kandidatëve për rezervistë dhe kërkoi të rekrutojë 363 kandidatë të cilët më 1 tetor 2026 nisën atë që njihet në Shqipëri si zbori. /noa.al