Pas 1.8 milionë spektatorëve dhe 161 milionë paundëve nga turneu i fundit, Dua Lipa po përgatit lëvizjen e radhës. Ja çfarë po planifikohet për vitin 2027

Londër – Dua Lipa po përgatitet për një tjetër vit të madh në skenën ndërkombëtare. Ylli shqiptar me famë botërore është në bisedime për realizimin e një turneu të ri global në stadiume gjatë vitit 2027, raportoi britanikja “The Sun” që citon sot noa.al.

Këngëtarja 31-vjeçare po planifikon një seri koncertesh të mëdha në vende të ndryshme të botës, pas suksesit të jashtëzakonshëm të turneut “Radical Optimism”. Planet e reja pritet të lidhen edhe me albumin e saj të katërt, i cili ende nuk është prezantuar zyrtarisht.

Turneu i saj i fundit përfshiu 81 koncerte dhe zgjati rreth 13 muaj. Sipas “The Sun”, Dua performoi për rreth 1.8 milionë spektatorë, ndërsa të ardhurat nga biletat arritën në rreth 161 milionë paund. Në qershor të vitit 2025 ajo realizoi gjithashtu dy koncerte “sold out” në stadiumin Wembley dhe dy të tjera në Anfield të Liverpoolit.

Datat dhe stadiumet e turneut të ri ende nuk janë përcaktuar përfundimisht, por një rikthim në Wembley konsiderohet një nga mundësitë kryesore. Në diskutim për koncertet në Londër është edhe stadiumi i Tottenham Hotspur.

Ndërkohë, këngët e para nga albumi i ri nuk pritet të publikohen deri vitin e ardhshëm, pavarësisht spekulimeve se Dua Lipa mund të rikthehej me muzikë të re shumë më shpejt.

Këngëtarja u rikthye në qendër të vëmendjes edhe gjatë fundjavës, kur surprizoi publikun duke iu bashkuar Shakirës në skenë gjatë koncerteve të artistes kolumbiane në Madrid. Dy yjet interpretuan së bashku këngën “Antología”.

Nëse planet për turneun e vitit 2027 konkretizohen, Dua Lipa do të rikthehet sërish në disa prej stadiumeve më të mëdha të botës, vetëm pak kohë pas një prej turneve më të suksesshme të karrierës së saj. /noa.al