TIRANË – Ambasadori i Shteteve të Bashkuara të Amerikës në Tiranë, Eric Wendt, zhvilloi një takim me kreun e Prokurorisë së Posaçme kundër Korrupsionit dhe Krimit të Organizuar (SPAK), Klodian Braho.

Sipas njoftimit zyrtar të Ambasadës amerikane në Tiranë, gjatë takimit u diskutua mbi luftën kundër krimit transnacional, trafikut të lëndëve narkotike dhe migracionit të paligjshëm, çështje që përbëjnë përparësi kryesore për administratën e Presidentit Donald Trump.

Lidhur me qëllimin e këtij takimi, Ambasada e SHBA-së deklaroi:

“Lufta kundër krimit transnacional, trafikut të narkotikëve dhe migracionit të paligjshëm është ndër përparësitë kryesore të Presidentit Donald Trump. Ambasadori Eric Wendt u takua me drejtuesit e SPAK-ut për të diskutuar rolin vendimtar të institucioneve të pavarura në përballimin e këtyre sfidave dhe se si partneriteti ynë kontribuon për një të ardhme më të sigurt e më të begatë për të dy kombet tona.”

Përmes kësaj deklarate, përfaqësia diplomatike theksoi rëndësinë e bashkëpunimit dypalësh dhe mbështetjen ndaj institucioneve të pavarura të drejtësisë në Shqipëri.