Dikur talenti i madh i Manchester United, sot pa klub, çfarë po ndodh me Adnan Januzajn

Adnan Januzaj, futbollisti belg me origjinë shqiptare që dikur konsiderohej një nga talentet më premtues të Manchester United, është sërish në vëmendjen e mediave belge për një arsye krejt tjetër: aktualisht ai ndodhet pa klub.

Media sportive belge “Walfoot” i ka kushtuar një material situatës së 31-vjeçarit, duke rikthyer edhe rrugëtimin e tij nga një prej emrave më të përfolur të futbollit europian te vështirësitë për të gjetur vazhdimësi në vitet e fundit.

Januzaj shpërtheu shumë i ri te Manchester United, ku paraqitjet e tij krijuan pritshmëri të mëdha. Në atë periudhë ai ishte në qendër të një debati ndërkombëtar edhe për përfaqësuesen që do të zgjidhte.

I lindur në Bruksel në një familje me origjinë shqiptare, Januzaj vendosi përfundimisht të përfaqësonte Belgjikën dhe ishte pjesë e “Djajve të Kuq” në kompeticione të mëdha ndërkombëtare.

Karriera e tij vijoi më pas në klube si Borussia Dortmund, Real Sociedad dhe Sevilla, por vitet e fundit nuk sollën vazhdimësinë që pritej nga talenti që kishte treguar në fillimet e tij.

Tashmë, ndërsa Januzaj është pa ekip, media belge shtron pyetjen nëse 31-vjeçari mund të gjejë një projekt të ri dhe të ringrejë karrierën. /noa.al