Xherdan Shaqiri është detyruar të shkojë në spital pas ndeshjes miqësore që Basel humbi me rezultatin e thellë 7-3 ndaj Winterthur.

Futbollisti me origjinë shqiptare u dëmtua në minutat e fundit të takimit dhe u detyrua të largohej nga fusha.

Sipas “Blick” që citon noa.al, Shaqiri pësoi një plagë të hapur në dorë pas një goditjeje gjatë lojës. Dëmtimi kërkoi ndërhyrje mjekësore dhe kapiteni i Basel u transportua në spital, ku plaga duhej të qepej.

Ngjarja i shtoi një tjetër shqetësim mbrëmjes së vështirë të Basel, që pësoi shtatë gola në ndeshjen e parë të trajnerit të ri Slavisa Jokanovic.

Winterthur kryesonte 4-0 që në përfundim të pjesës së parë, ndërsa Basel reagoi vetëm pjesërisht pas pushimit dhe ndeshja u mbyll 7-3.

Nuk janë raportuar deri tani komplikime të tjera serioze për Shaqirin përtej plagës që kërkoi qepje. /noa.al