Paris – Kombëtarja U21 e Francës ka siguruar kualifikimin për Kampionatin Europian të vitit 2027, turne që do të organizohet nga Shqipëria dhe Serbia.

“Les Bleuets” fituan 3-2 ndaj Luksemburgut në Orléans, në një ndeshje me shumë emocione, duke vulosur matematikisht pjesëmarrjen në fazën finale që do të zhvillohet nga 16 qershori deri më 3 korrik 2027.

Franca kaloi shpejt në avantazh me Steve Ngoura, i cili realizoi dy herë, në minutat 10 dhe 25. Situata u komplikua pas kartonit të kuq të Joane Gadou në minutën e 51-të, ndërsa Luksemburgu arriti të barazonte 2-2.

Goli vendimtar erdhi në minutën e 83-të, kur Mathys Tel shënoi me kokë pas një goditjeje këndi dhe i dha Francës fitoren dhe kualifikimin.

Por menjëherë pas sigurimit të biletës për në Shqipëri dhe Serbi, trajneri Gérald Baticle ngriti një tjetër shqetësim: disponueshmërinë e lojtarëve të tij gjatë verës së ardhshme.

Baticle u bëri thirrje veçanërisht klubeve franceze që t’i lejojnë futbollistët e rinj të marrin pjesë në Europian, duke kërkuar që grupi që fitoi kualifikimin të ketë mundësinë të përfaqësojë Francën edhe në fazën finale.

Trajneri kujtoi se në Europianin U21 të vitit 2025 Franca kishte shkuar pa një numër të konsiderueshëm lojtarësh për shkak të mosdisponueshmërisë së tyre nga klubet.

Tashmë destinacioni i radhës për talentet franceze është Ballkani, me Shqipërinë që do të jetë një prej dy vendeve pritëse të kompeticionit. /noa.al