E merr nga Berati për punime te shtëpia e djalit, 64-vjeçari bie nga kati i dytë dhe humb jetën në Gjirokastër

Një ngjarje e rëndë është regjistruar në lagjen “Varosh” të Gjirokastrës, ku një 64-vjeçar ka humbur jetën pasi dyshohet se ka rënë aksidentalisht nga kati i dytë i një banese gjatë punimeve.

Viktima është A. N., 64 vjeç, banues në Dimal rrethi Berat, i cili ishte marrë për të kryer punime në banesën e djalit të një shtetasi nga Fieri.

Sipas Policisë, gjatë punës 64-vjeçari dyshohet se është rrëzuar nga kati i dytë dhe, si pasojë e dëmtimeve të marra, ka humbur jetën.

Pas ngjarjes, policia arrestoi shtetasin J. F., banues në Fier, i cili kishte marrë 64-vjeçarin për të kryer punimet.

Arrestimi është bërë për veprën penale “Shkelja e rregullave të mbrojtjes në punë”.

Materialet procedurale i janë referuar Prokurorisë për veprime të mëtejshme, ndërsa hetimet vijojnë për të sqaruar të gjitha rrethanat e ngjarjes.