Deputeti i Partisë Socialiste, Vullnet Sinaj, ka zgjedhur të mos japë një koment të gjatë për qëndrimin e tij ndaj reformës së re territoriale, pasi më herët ka votuar kundër draftit brenda grupit parlamentar të PS-së.

Sinaj u pyet nga gazetarët teksa po hynte në Kuvend, nëse do t’i qëndrojë qëndrimit të shprehur më herët apo nëse do të votojë ndryshe në seancën plenare.

Në përgjigje, deputeti u shpreh shkurt: “Ishte votë brenda grupit parlamentar”.

Sinaj dhe deputeti Erion Braçe kanë shprehur rezerva ndaj propozimit të ri territorial të mazhorancës. Sipas raportimeve, në mbledhjen e grupit parlamentar socialist ata votuan kundër draftit që parashikon reduktimin e numrit të bashkive nga 61 në 46, përmes bashkimit të 15 njësive vendore.

Qëndrimi i dy deputetëve vjen në një moment kur reforma kërkon 84 vota për t’u miratuar në Kuvend.

Mbetet për t’u parë nëse qëndrimi i shprehur në mbledhjen e grupit parlamentar do të reflektohet edhe në votimin përfundimtar në Kuvend.