Një 35-vjeçar është arrestuar në Tiranë në kuadër të operacionit policor “Shkolla të pastra”, i fokusuar në parandalimin dhe goditjen e shitjes së lëndëve narkotike në afërsi të shkollave.

Sipas Policisë së Tiranës, shtetasi me inicialet A. K. u kap në flagrancë në zonën e Kombinatit, pranë perimetrit të sigurisë së një shkolle. Gjatë kontrollit fizik dhe më pas në banesën e tij, policia thotë se gjeti mbi 1 kilogram Cannabis Sativa, një sasi kokaine, tre peshore elektronike, dy telefona celularë dhe një shumë parash, e dyshuar se ishte përfituar nga shitja e lëndëve narkotike në doza.

Nga veprimet hetimore dhe informacionet e siguruara, sipas Policisë, dyshohet se 35-vjeçari tentonte të shiste lëndë narkotike në afërsi të shkollave, si dhe në ambiente të tjera në zonën e Kombinatit.

Operacioni u finalizua nga shërbimet e Komisariatit të Policisë Nr. 6, në bashkëpunim me specialistët e Seksionit për Hetimin e Narkotikëve.

Materialet procedurale i janë referuar Prokurorisë për veprime të mëtejshme.

Hetimi vijon për të dokumentuar plotësisht aktivitetin e dyshuar dhe rrethanat e rastit.