ATHINË — Greqia do të ndalojë përdorimin e rrjeteve sociale nga fëmijët nën 15 vjeç duke filluar nga 1 janari 2027, duke i kaluar përgjegjësinë kryesore platformave teknologjike për verifikimin e moshës dhe bllokimin e llogarive.

Vendimi i qeverisë së Kyriakos Mitsotakis synon të parandalojë varësinë nga ekranet, problemet me gjumin e përqendrimin, si dhe pasojat në shëndetin mendor të të miturve. Ndryshimi do të prekë si regjistrimet e reja, ashtu edhe llogaritë ekzistuese ku është deklaruar moshë e rreme.

Sipas të dhënave zyrtare të përdorura nga qeveria greke, 66% e nxënësve të arsimit fillor dhe 74% e atyre të arsimit të mesëm kanë pranuar se kanë deklaruar moshë të rreme gjatë krijimit të profileve të tyre.

Për zbatimin e rregullave të reja:

Sistemi i verifikimit: Athina propozon përdorimin e aplikacionit shtetëror "Kids Wallet", i cili konfirmon nëse përdoruesi e plotëson kufirin e moshës pa i kaluar kompanive të dhëna të tjera personale.

Përgjegjësia e kompanive: Platformat do të jenë të detyruara të përdorin teknologji të besueshme për kontrollin e moshës, duke shmangur kalimin e barrës te prindërit apo kontrollin individual nga shteti.

Fushëveprimi: Masat synojnë vetëm rrjetet sociale me profile publike dhe interaktivitet, duke përjashtuar shërbimet e komunikimit privat.

Qeveria greke ka njoftuar vendimin edhe në nivel të Bashkimit Evropian, ndërsa kompanitë teknologjike kanë afat deri në fund të këtij viti për të përshtatur sistemet e tyre përpara hyrjes në fuqi të ligjit.