KORÇË — Një rast i dyshuar helmimi te një grup fëmijësh në kopshtin nr. 2 në qytetin e Korçës ka shkaktuar shqetësim të madh te prindërit dhe familjarët e të vegjëlve.

Mëngjesin e së hënës, prindërit kërkuan më shumë qartësi nga institucionet përkatëse dhe kontrolle të shtuara për sigurinë e ushqimit dhe higjienës, duke deklaruar se nuk kanë marrë informacione zyrtare nga drejtuesit e kopshtit gjatë ditëve të fundit. Ditën e sotme, drejtuesit e kopshtit u kanë komunikuar prindërve se simptomat e shfaqura mund të jenë pasojë e një viroze stinor.

Nga ana tjetër, Instituti i Shëndetit Publik (ISHP) ka kryer monitorimin e ambienteve të kopshtit, ku paraprakisht kushtet higjieno-sanitare kanë rezultuar brenda standardeve. Analizat e para bakteriologjike të mostrave të marra nga uji dhe ushqimi nuk kanë evidentuar ndotje.

Në kuadër të hetimeve, edhe Autoriteti Kombëtar i Ushqimit (AKU) ka marrë mostra ushqimore për t’i analizuar pranë ISUV-it. Rezultatet e këtyre analizave pritet të përcaktojnë shkakun e plotë të problemeve shëndetësore të shfaqura te fëmijët.