LIBOHOVË — Një ngjarje e paprecedentë është shënuar në Kalanë e Libohovës, ku barkodi i vendosur në tabelën informative me qëllim orientimin e turistëve i dërgonte përdoruesit në faqe me përmbajtje pornografike.

Pas skanimit të kodit QR, në ekranet e telefonave të vizitorëve shfaqeshin pamje të papërshtatshme. Disa prej tyre e kanë denoncuar menjëherë rastin pranë autoriteteve vendore.

Sapo është njohur me ngjarjen, Bashkia e Libohovës ka ndërhyrë duke hequr menjëherë barkodin nga tabela dhe ka nisur verifikimet për zbardhjen e shkaqeve.

Sipas autoriteteve lokale, shkaku i këtij incidenti dyshohet të jetë një hakerim ose skadimi i domenit të përdorur nga kompania e huaj që kishte instaluar sistemin e barkodeve vite më parë. Bashkia ka kërkuar krijimin e një aksesi të ri informativ, si dhe verifikimin e të gjitha kodeve QR të vendosura në sitet e tjera turistike të zonës.