Kontrolli u zgjerua nga rruga në banesë dhe garazh. Karabinierët sekuestruan 340 gramë kokainë, marijuanë, para dhe pajisje paketimi

Një shqiptar 33 vjeç dhe bashkëshortja e tij italiane, 51 vjeçe, janë arrestuar në Gardone Val Trompia të Brescias nën akuzën e posedimit të drogës me qëllim shitjeje.

Operacioni nisi pasi karabinierët vunë re 51-vjeçaren teksa, pasi kishte dalë nga banesa, i dorëzonte një pako një personi tjetër.

Kontrolli i menjëhershëm zbuloi një dozë kokainë dhe para cash që dyshohet se ishin marrë nga shitja, raporton noa.al.

Më pas karabinierët kontrolluan banesën dhe garazhin e çiftit, ku ndodhej edhe bashkëshorti shqiptar.

Në total u sekuestruan rreth 340 gramë kokainë, 20 gramë marijuanë, 1.200 euro cash, peshore elektronike dhe materiale për paketimin e dozave.

33-vjeçari shqiptar u dërgua në burgun e Brescias, ndërsa bashkëshortja u vendos në arrest shtëpie në pritje të procedurave gjyqësore. /noa.al