Operacioni nisi nga një lëvizje e dyshimtë në Morciano di Romagna dhe përfundoi me mbi 25 kg kokainë, afro 30 mijë euro cash dhe dy shqiptarë në pranga

Një operacion i madh antidrogë në Romagna ka përfunduar me arrestimin e dy shtetasve shqiptarë, 46 dhe 34 vjeç, dhe sekuestrimin e më shumë se 25 kilogramëve kokainë, raporton noa.al.

Operacioni u zhvillua nga Policia e Shtetit në Morciano di Romagna dhe Cesena. Hetuesit kishin vënë nën vëzhgim lëvizjet e dy burrave dhe ndërhynë pasi vunë re një çantë të madhe që po vendosej në një Citroën C3.

Brenda automjetit u gjetën 20 pako kokainë me peshë mbi 22 kilogramë. Kontrollet vazhduan më pas në banesën e 34-vjeçarit në Cesena, ku policia zbuloi edhe rreth 2.7 kilogramë kokainë të fshehur në një fund të dyfishtë të një mobiljeje televizori.

Në banesë u sekuestruan gjithashtu rreth 29.500 euro cash dhe materiale për paketimin e drogës.

Sipas vlerësimeve të autoriteteve italiane, sasia e sekuestruar mund të kishte sjellë rreth 10 milionë euro në tregun ilegal.

Dy shqiptarët u dërguan në burgun e Riminit dhe akuzohen për posedim të lëndëve narkotike me qëllim shpërndarjeje, raporton noa.al duke cituar tv lokal Teleromagna.