Vienna, Georgia, 5 tetor 2026 – Një festë në natyrë me më shumë se 1 mijë pjesëmarrës është kthyer në skenë të një incidenti të rëndë me armë zjarri në qytetin Vienna, në qarkun Dooly të Xhorxhias, ku dy të rinj kanë humbur jetën dhe dhjetëra persona janë plagosur.

Sipas autoriteteve, të shtënat u raportuan rreth orës 01:25, ndërsa në zonë ndodheshin edhe forca policore që po monitoronin aktivitetin për shkak të numrit të madh të pjesëmarrësve.

Dy viktimat, 20 dhe 23 vjeç, u konfirmuan nga mjeku ligjor i qarkut Dooly, Brett Walls. Identitetet e tyre nuk janë bërë ende publike, ndërsa familjarët janë njoftuar për humbjen e të afërmve.

Përmasat e incidentit mbeten ende në vlerësim. Të paktën 25 persona janë dërguar në spitale për trajtim mjekësor, ndërsa autoritetet nuk përjashtojnë që numri i përgjithshëm i të plagosurve të shkojë deri në 35.

Sherifi i qarkut Dooly, Craig Peavy, bëri të ditur se të shtënat kanë ndodhur në të paktën dy pika të ndryshme, të ndara nga rreth një bllok. Sipas tij, rreth 50 persona ndodheshin në zonën ku u hap zjarr.

Deri tani nuk është përcaktuar nëse sulmi është kryer nga një person i vetëm apo nëse janë përfshirë disa autorë. Edhe motivi i ngjarjes mbetet i paqartë.

Hetimi po zhvillohet nga Byroja e Hetimeve të Xhorxhias në bashkëpunim me autoritetet lokale. Hetuesit po mbledhin dëshmi dhe prova për të përcaktuar dinamikën e të shtënave, numrin e personave të përfshirë dhe rrethanat që çuan në incident.

Autoritetet vijojnë punën në terren, ndërsa priten të dhëna të reja mbi gjendjen e të plagosurve dhe identifikimin e personave përgjegjës.

BREAKING: At least 2 dead, multiple others injured in a mass shooting at a Homecoming event in Vienna, Georgia, on Sunday, Oct. 4, 2026, according to local reports. The exact number of injured has not been confirmed. pic.twitter.com/rgpFa26FxU

— HINT News (@9415st) October 4, 2026