BRUKSEL – Komisioni Evropian po shqyrton një plan të ri strategjik i cili mund t’u mundësojë Shqipërisë dhe Malit të Zi të emërojnë komisionerët e tyre në Bruksel përpara se të anëtarësohen zyrtarisht në Bashkimin Evropian.

Nisma, e raportuar nga media belge “Rapporteur” dhe e paralajmëruar gjatë vizitës së presidentes së KE-së Ursula von der Leyen, synon të përfshijë më nga afër vendet kandidate në vendimmarrjen politike evropiane gjatë kohës që 27 shtetet anëtare kryejnë procedurat e gjata të ratifikimit kombëtar.

Në dokumentin e publikuar nga media belge citohet qëndrimi i ekzekutivit evropian:

“Komisioni Evropian e konsideron të justifikuar mundësinë që një vend që po anëtarësohet në union duhet të emërojë një Komisioner gjatë kësaj periudhi.”

Më tej, dokumenti sqaron funksionin dhe statusin e përfaqësuesve të rinj në strukturat e BE-së:

“Një komisioner i tillë mund të marrë pjesë në punën e Kolegjiumit për çështje relevante, duke ruajtur plotësisht autonominë, kolegjialitetin dhe përgjegjësinë kolektive të këtij organi drejtues të BE-së.”

Vendosja e komisionerëve përpara anëtarësimit të plotë përbën një precedent të paprecedentë në historinë e Bashkimit Evropian. Paralelisht me këtë masë, Komisioni Evropian planifikon t’u ofrojë vendeve kandidate integrim më të thellë në tregun e përbashkët paralel me ecurinë e reformave të brendshme.

Detajet e plota të kësaj strategjie të re të zgjerimit pritet të paraqiten zyrtarisht të martën në Bruksel nga komisionerja Marta Kos.