DUBAI – Pak më shumë se një orë pas incidentit dramatik në bordin e fluturimit të kompanisë "Flydubai" nga Dubai drejt Tel Avivit, në rrjetet sociale nisën të përhapeshin teori konspirative që pretendonin se ngjarja ishte e inskenuar nga Izraeli.

Sipas një hulumtimi të qendrës CAM për studimin e antisemitizmit, brenda 12 orëve të para në platformën X u publikuan afërsisht 3 mijë postime që ia atribuonin incidentin Izraelit, shërbimit sekret Mossad, apo kryeministrit Benjamin Netanyahu.

Në veçanti, një postim nga influencuesi amerikan i ekstremit të djathtë, Jackson Hinkle, e paraqiti ngjarjen si një operacion të inskenuar, duke grumbulluar më shumë se 2.4 milionë shikime.

Pretendimet e përhapura në internet varionin nga supozimi se Netanyahu e dinte paraprakisht për ngjarjen, e deri te pretendimet se numri i fluturimit fshihte mesazhe simbolike, apo se mungesa e aktivizimit të maskave të oksigjenit përbënte provë se ngjarja nuk kishte ndodhur.

Gjithashtu, në rrjet qarkulloi edhe një video e falsifikuar me logon e mediat BBC, e cila aludonte për përfshirjen e inteligjencës indiane dhe asaj izraelite.

Megjithatë, faktet e konfirmuara nga autoritetet zyrtare rrëzojnë pretendoimet për inskenim. Kompania "Flydubai" konfirmoi përplasjen e dhunshme në kabinën e pilotëve, ndërsa prokurori i përgjithshëm i Emirateve të Bashkuara Arabe deklaroi zyrtarisht se bashkëpiloti kishte tentuar të kryente një akt terrorist, duke sulmuar kapitenin me një sëpatë emergjence për të marrë kontrollin e mjetit fluturues.

Nga hetimet e deritanishme, i dyshuari është identifikuar si Hammam al-Hammami, shtetas nga Omani. Mësohet se ai holdshte larguar më parë nga detyrat e fluturimit në kompaninë "Oman Air" për shkak të pikëpamjeve të tij radikale, përpara se të punësohej nga "Flydubai".

Ndërkohë, autoritetet në Emiratet e Bashkuara Arabe dhe ato izraelite po vijojnë hetimet për të sqaruar se si i dyshuari kaloi kontrollet e sigurisë dhe u caktua në linjën drejt Tel Avivit, si dhe për të përcaktuar nëse ka pasur bashkëpunëtorë të tjerë në këtë ngjarje. Ynet