PRISHTINË – Organizatori i protestave “Jo në emrin tim”, Çlirim Haziri, ka njoftuar në natën e 19-të të tubimit se protestuesit do ta kalojnë të gjithë natën në shesh përpara godinës së Kuvendit të Kosovës.

Lëvizja ka ftuar qytetarët t’i bashkohen protestës ditën e hënë në orën 08:00 në sheshin "Skënderbeu", përpara nisjes së seancës plenare ku pritet të shqyrtohet në parim Projektligji për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar. Seanca është thirrur nga kryetarja e Kuvendit, Albulena Haxhiu, për në orën 09:00.

Përmes një postimi në rrjetet sociale, Haziri deklaroi:

“Sonte qëndrojmë para dyerve të Kuvendit.

Pa dallime partiake. Bashkë për një kërkesë: VOTOJENI LIGJIN!

Nga ora 08:00 e mëngjesit, i bëjmë thirrje secilit qytetar të na bashkohet në sheshin Skënderbeu.

UÇK-ja është historia jonë. Identiteti ynë. Liria jonë.

NESËR, ORA 08:00 në mëngjes

TË GJITHË NË SHESHIN SKËNDERBEU

JO NË EMRIN TIM”

Organizatorët kërkojnë kalimin e ndryshimeve ligjore për mbrojtjen e luftës së UÇK-së dhe paralajmërojnë prani masive të qytetarëve përpara nisjes së punimeve parlamentare.