ELBASAN – Një trafik i rënduar me radhë kilometrike automjetesh është regjistruar mbrëmjen e sotme në aksin rrugor Elbasan–Tiranë, duke shkaktuar vonesa të shumta dhe ngadalësim të qarkullimit.

Situata më kritike paraqitet pranë rrethrrotullimit të Bradasheshit, ku lëvizja e mjeteve është thuajse e paralizuar dhe lëvizet me shpejtësi tepër të ulët. Rëndimi i trafikut lidhet kryesisht me fluksin e lartë të qytetarëve që kthehen drejt kryeqytetit pas përfundimit të fundjavës, çka ka tejkaluar kapacitetin normal të këtij aksi.

Ekipet e Policisë Rrugore ndodhen në terren për menaxhimin e situatës dhe lehtësimin e lëvizjes, ndërsa u bëjnë thirrje drejtuesve të mjeteve të tregojnë kujdes e durim si dhe të respektojnë rregullat e qarkullimit rrugor.