PRISHTINË – Kryetarja e Kuvendit të Kosovës, Albulena Haxhiu, ka thirrur për ditën e hënë, më 5 tetor, një seancë plenare në orën 09:00, ku si pikë e parë e rendit të ditës është caktuar shqyrtimi i parë i Projektligjit për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar.

Përpara nisjes së seancës, në orën 08:00, Komisioni për Legjislacion i udhëhequr nga deputeti i Lëvizjes Vetëvendosje, Vigan Qorrolli, do të mblidhet për të shqyrtuar aspektet juridike, përputhshmërinë me Kushtetutën dhe procedurat parlamentare.

Nisma ligjore është dorëzuar nga Partia Demokratike e Kosovës më 21 shtator, pas dënimit të ish-krerëve të Ushtrisë Çlirimtare të Kosovës në Hagë. Më 16 shtator, Hashim Thaçi dhe Jakup Krasniqi u dënuan me nga 25 vjet burgim, Kadri Veseli me 18 dhe Rexhep Selimi me 13 vjet për krime lufte, ndërsa u shpallën të pafajshëm për krime kundër njerëzimit.

Projektligji i propozuar nga PDK-ja parashikon ndryshime në juridiksionin e Dhomave të Specializuara, mundësinë e kalimit të rasteve jashtë juridiksionit të tyre te gjykatat në Kosovë, ankesat në Gjykatën Supreme të Kosovës, kufizimin e dënimit maksimal në 15 vjet, vuajtjen e dënimeve brenda territorit të Kosovës, si dhe mundësinë e faljes presidenciale.

Qeveria e Kosovës ka dhënë mendim pozitiv për nismën, duke vlerësuar se nuk ka pengesa ligjore apo buxhetore. Ky zhvillim vjen në një moment kritik politik, pasi më 6 tetor përfundon afati kushtetues 60-ditor për zgjedhjen e presidentit të ri, dështimi i të cilit dërgon vendin në zgjedhje të parakohshme.

Lidhur me kushtëzimin e votave të PDK-së për postin e kryetarit të shtetit me miratimin e këtij ligji, kryetari i PDK-së, Bedri Hamza, u shpreh:

“Vazhdimisht po e tregosh, kërkesa e PDK-së është aprovimi final i ligjit. Pastaj, PDK-ja është e gatshme në të njëjtën ditë, në seancën e radhës të bisedojë e ta gjejë zgjidhjen për presidentin dhe t’i japë votat për presidentin.”

Këto ndryshime ligjore trajtohen në Kuvend ndërkohë që në Kosovë vijojnë protestat e përnatshme qytetare me moton “Jo në emrin tim” kundër vendimit të Gjykatës Speciale.