TIRANË – Partia Demokratike ka propozuar zyrtarisht ndryshime në kodin zgjedhor për zgjedhjet vendore të vitit 2027, duke kërkuar rikthimin e sistemit të balotazhit për zgjedhjen e kryetarëve të bashkive si dhe aplikimin e listave 100% të hapura për këshillat bashkiakë.

Sipas propozimit të demokratëve, një kandidat për kryetar bashkie do të mund të shpallet fitues që në raundin e parë vetëm nëse arrin të marrë më shumë se 50% të votave të vlefshme. Në rast se asnjë nga kandidatët nuk e kalon këtë prag, gara do të kalojë në raundin e dytë balotues mes dy kandidatëve më të votuar.

Lidhur me këtë nismë ligjore, deputeti demokrat Oerd Bylykbashi argumentoi se kjo reformë siguron që drejtuesit lokalë të gëzojnë mbështetjen e shumicës reale të qytetarëve dhe të shmanget zgjedhja e tyre me shumicë relative në kushtet e fragmentimit të votës.

Në një intervistë të dhënë për mediat, Oerd Bylykbashi deklaroi:

“Një kryetar bashkie nuk duhet të jetë i forcës politike; duhet të jetë i qytetarëve. Dhe një kryetar bashkie që zgjidhet me një shumicë të thjeshtë relative, me 20-30% apo 30% të votave, sepse votat fragmentohen, nuk përfaqëson shumicën dhe vullnetin e shumicës së qytetarëve që kërkojnë të zgjedhin në hallin e tyre. Unë vetë do të çoj përpara idenë e hapjes së listave 100% për sa u përket këshillave vendorë. Sigurisht që e komplikon procesin e KQZ-së, por rrit demokracinë në raport me mundësinë e zgjedhësve për të votuar.”

Paralelisht me balotazhin, PD këmbëngul edhe për kalimin në lista të hapura pa asnjë kufizim për anëtarët e këshillave bashkiakë, me qëllim që zgjedhësve t’u jepet e drejta e votimit të drejtpërdrejtë për përfaqësuesit e tyre në nivel lokal.