I vuri flakën mbeturinave në tokën e tij, 76-vjeçari humb jetën teksa përpiqej të shuante zjarrin në Mallakastër

Ngjarje tragjike në Greshicë të Mallakastrës. 76-vjeçari dyshohet se ndezi zjarr në tokën e tij për të djegur mbeturinat, por flakët dolën jashtë kontrollit. Ai humbi jetën gjatë përpjekjeve për t’i shuar.

Fier – Një ngjarje e rëndë është regjistruar rreth mesditës së sotme në fshatin Greshicë të Mallakastrës, qarku Fier, ku një 76-vjeçar ka humbur jetën gjatë përpjekjeve për të shuar një zjarr.

Sipas informacionit paraprak të Policisë së Fierit, rreth orës 12:00, shtetasi Nazif Cenaj, 76 vjeç, dyshohet se ka ndezur zjarr në tokën e tij me qëllim djegien e mbeturinave.

Flakët dyshohet se kanë dalë jashtë kontrollit dhe i moshuari ka tentuar t’i shuajë.

Gjatë përpjekjeve për të ndalur përhapjen e zjarrit, 76-vjeçari ka humbur jetën.

Grupi hetimor ka mbërritur në vendngjarje dhe po punon për të sqaruar plotësisht dinamikën dhe rrethanat e ngjarjes. /noa.al