TIRANË – Një person i konsideruar me rrezikshmëri të lartë shoqërore, i shpallur në kërkim ndërkombëtar nga autoritetet italiane, është arrestuar nga Policia e Shtetit në zonën e Saukut në Tiranë me qëllim ekstradimin drejt Italisë.

I arrestuari është identifikuar si shtetasi Orando Çeta (alias Ceta), 40 vjeç, banues në kryeqytet. Kapja e tij u realizua në kuadër të operacionit policor të koduar “FAST”, i zhvilluar nga Sektori për Kërkimin FAST Albania në bashkëpunim me Drejtorinë Vendore të Policisë Tiranë.

Gjykata e Apelit e Triestes në Itali e ka dënuar 40-vjeçarin me 21 vjet, 9 muaj e 20 ditë burgim për një sërë veprash të rënda penale, nga të cilat i kanë mbetur për të vuajtur edhe 20 vjet, 6 muaj e 14 ditë.

Lidhur me aksionin, Policia e Shtetit njoftoi zyrtarisht:

“Finalizohet një tjetër fazë e operacionit policor të koduar “FAST”. Kapet në Tiranë një person i kërkuar nga Italia, me rrezikshmëri të lartë shoqërore, i dënuar me 21 vjet e 9 muaj e 20 ditë burgim për disa vepra të rënda penale. Shërbimet Operacionale të Sektorit për Kërkimin FAST Albania, në Drejtorinë e Forcës së Posaçme Operacionale, në Departamentin e Policisë Kriminale, në bashkëpunim me DVP Tiranë, në kuadër të operacionit policor të koduar “FAST”, lokalizuan në zonën e Saukut, Tiranë, kapën dhe arrestuan, me qëllim ekstradimi, shtetasin Ornado Çeta alias Ceta, 40 vjeç, banues në Tiranë. Gjykata e Apelit e Triestes, Itali, e ka dënuar me 21 vjet, 9 muaj e 20 ditë burgim, për veprat penale “Vjedhje të rënda”; “Mashtrim”; “Trafikim të lëndëve narkotike”; “Posedim të pasurisë me origjinë kriminale”; “Plagosje”; “Kanosje”; “Kundërshtim ndaj punonjësve të policisë”. Nga dënimi i dhënë, i kanë mbetur për të vuajtur 20 vjet, 6 muaj e 14 ditë burgim. Interpol Tirana po bashkëpunon me Interpol Romën për të finalizuar procedurat për ekstradimin e këtij shtetasi drejt Italisë.”