NJU JORK – Shtetet e Bashkuara kanë dëbuar dy anëtarë të delegacionit iranian në Kombet e Bashkuara, pasi këta të fundit nuk u larguan nga territori amerikan menjëherë pas përfundimit të punimeve të Asamblesë së Përgjithshme të OKB-së.

Sipas raportimeve nga mediat e huaja, Departamenti Amerikan i Shtetit kishte kërkuar që i gjithë delegacioni iranian, përfshirë Ministrin e Jashtëm Abbas Araghchi, të largohej nga vendi. Megjithatë, dy prej anëtarëve qëndruan jashtë afatit në Nju Jork përpara se të lëshonin territorin e SHBA-së, përkatësisht njëri të premten në mbrëmje dhe tjetri të shtunën në mëngjes.

Ky zhvillim vjen menjëherë pas takimeve diplomatike midis zyrtarëve amerikanë dhe atyre iranianë në Nju Jork, të zhvilluara në kuadër të përpjekjeve për të rifilluar dialogun dypalësh. Nga ana tjetër, Teherani zyrtar ka deklaruar se aktualisht nuk ka planifikuar ndonjë raund të ri bisedimesh të drejtpërdrejta me Uashingtonin.