HELSINKI – Pas humbjes 2-1 ndaj Finlandës, trajneri Rolando Maran nuk e ka fshehur zhgënjimin për rezultatin, ndërsa ka adresuar kritika të drejtpërdrejta ndaj gjykimit të ndeshjes.

Tekniku italian u shpreh se skuadra e tij meritonte më shumë nga kjo përballje, edhe pse u detyrua të luante me një lojtar më pak pas daljes me karton të kuq të portierit Etrit Berisha.

Në deklaratën e tij pas ndeshjes, Maran theksoi:

“Meritonim një rezultat pozitiv sepse bëmë një ndeshje të mirë. Meritonim edhe fitoren, por u penalizuam nga kartoni i kuq. Kishim disa mundësi gjatë ndeshjes. U penalizuam dhe na vjen keq për këtë rezultat. Gjatë ndeshjes kishim disa raste të mira për të shënuar. Duhet të përmirësojmë disa gjëra dhe të rinisemi. Një paraqitje e tillë na jep forcë për të ecur para. Na kanë penalizuar disa vendime të arbitrave, që janë të pakuptimta. Megjithatë, kjo paraqitje na jep besim për të ardhmen.”

I pyetur për zëvendësimin taktik të sulmuesit anësor Arbër Hoxha pas kartonit të kuq të Berishës, trajneri sqaroi vendimin e tij:

“Zëvendësimi i Hoxhës? Kemi bërë një ndeshje të mirë. Në bazë të karakteristikave na duhej Manaj në fushë. Mund të shfrytëzonim hapësirat e Muçit. Hoxha po bënte një ndeshje të mirë, por duhej ta merrja si vendim.”