Polic ditën, komedian në skenë, shqiptari Luan sjell në Gjermani historitë mes dy kulturave

Një polic shqiptar që prej vitesh ka fituar publik edhe si komedian po vazhdon turneun e tij në Gjermani me një format të veçantë, ku humori ndërthuret me përvojat e jetës mes kulturës shqiptare dhe asaj gjermane.

Luan u ngjit më 2 tetor në skenën e Theaterhaus Stuttgart me spektaklin e tij të tretë solo, “Glaub halt net!”, ndërsa më 3 tetor shfaqja vijon në Friedrichshafen. Programi në Stuttgart ishte konceptuar posaçërisht si një mbrëmje dygjuhëshe, në gjermanisht dhe shqip.

Faqet gjermane të eventeve e prezantojnë Luanin si polic, familjar, “Schwabe und Albaner”, një ndërthurje identitetesh që është bërë edhe baza e materialit të tij humoristik. Në skenë ai sjell histori nga puna në polici, jeta familjare, fëmijëria dhe përvojat si shqiptar i rritur në Stuttgart.

Vetë ideja e “Glaub halt net!” lidhet me reagimin që, sipas tij, merr shpesh kur tregon episode të pazakonta nga jeta. Në shqip kjo frymë përkthehet afërsisht me shprehjen “Hajt, mos rrej”, e cila përdoret edhe në përshkrimin e programit.

Shfaqja synon veçanërisht publikun që njeh të dyja kulturat dhe luan me dallimet mes disiplinës tipike gjermane dhe spontanitetit shqiptar. Pjesë e programit janë edhe personazhet e tij të njohura Dirk, Ivica dhe Fatmir.

Pas Stuttgartit, Luan performon mbrëmjen e 3 tetorit në Kulturhaus Caserne në Friedrichshafen, ndërsa turneu vazhdon më tej në qytete të tjera gjermane.