Diaspora shqiptare në Shtetet e Bashkuara po përgatitet për edicionin e pestë të Panairit të Librit Shqip, një aktivitet që synon të bashkojë shkrimtarë, botues dhe lexues nga të gjitha trevat shqiptare dhe diaspora.

Në organizim do të përfshihen Shoqata e Shkrimtarëve Shqiptaro-Amerikanë, Lidhja e Shkrimtarëve dhe Artistëve të Shqipërisë dhe Lidhja e Shkrimtarëve të Kosovës.

Organizatorët e konsiderojnë panairin një platformë për promovimin e letërsisë shqipe në SHBA dhe për forcimin e bashkëpunimit ndërmjet krijuesve që jetojnë në Shqipëri, Kosovë dhe diasporë.

Gjatë përgatitjeve është theksuar edhe synimi që veprimtaria të mos mbetet vetëm një takim periodik kulturor, por të shndërrohet në një hapësirë bashkëpunimi mes autorëve, botuesve, përkthyesve, bibliotekave dhe institucioneve kulturore shqiptare e amerikane.

Shoqata e Shkrimtarëve Shqiptaro-Amerikanë është themeluar në vitin 2001 dhe përgjatë viteve ka mbledhur dhjetëra autorë që krijojnë dhe botojnë në SHBA.