Një gjurmë gishti zbulon 20-vjeçarin shqiptar në Itali, policia rikuperon 30 mijë euro sende

Sicili – Një 20-vjeçar shqiptar është arrestuar në Ragusa të Sicilisë, pasi dyshohet për një seri vjedhjesh të kryera gjatë natës në dyqane dhe banesa, raporton noa.al.

I arrestuari është identifikuar nga mediat italiane si Arxhens Zykollari, 20 vjeç, i lindur në Shqipëri. Sipas policisë, ai dyshohet se lëvizte me skuter gjatë natës dhe kryente vjedhje në objekte të ndryshme.

Hetuesit arritën të lidhnin 20-vjeçarin me rastet pas gjetjes së një gjurme gishti në një prej vendeve ku ishte kryer vjedhja.

Një rol të rëndësishëm në hetim kanë pasur edhe pamjet e kamerave të sigurisë të vendosura nga pronarët e bizneseve përpara dyqaneve të tyre.

Gjatë hetimeve policia ka identifikuar edhe katër shqiptarë të tjerë, të dyshuar për marrjen ose mbajtjen e sendeve të vjedhura.

Autoritetet kanë rikuperuar televizorë, katër biçikleta, kompjuterë dhe tabletë me një vlerë të përgjithshme prej rreth 30 mijë eurosh. Sendet u janë kthyer pronarëve të ligjshëm, citon noa.al, gazetën lokale La Sicilia.

Ndalimi i Arxhens Zykollarit është konfirmuar nga autoritetet gjyqësore dhe 20-vjeçari ndodhet në burg, ndërsa hetimet për rastet e tjera vijojnë. /noa.al