Një tjetër rast i dyshuar i dhunës në familje është regjistruar në Lavrio të Greqisë, vetëm pak orë pas sulmit të rëndë ndaj një 32-vjeçareje dhe partnerit të saj rumun.

Këtë herë, një 23-vjeçare, e cila është në muajin e shtatë të shtatzënisë dhe ka një fëmijë 3 vjeç e gjysmë me ish-partnerin, një shtetas shqiptar, është paraqitur në Komisariatin e Policisë së Lavrios dhe ka bërë kallëzim për dhunë në familje.

Sipas raportimeve të mediave greke, e reja ka denoncuar ngacmime dhe kërcënime të vazhdueshme nga ish-partneri, duke pretenduar se ai vazhdon të përpiqet t’i afrohet.

Incidenti më i fundit mes tyre ka ndodhur në një kënd lojërash, ku 23-vjeçarja pretendon se ish-partneri i është afruar dhe e ka kërcënuar.

Si pasojë e tronditjes së fortë psikologjike, gruaja shtatzënë është transportuar në spital, ku ka marrë ndihmë dhe është mbajtur nën kujdesin e mjekëve.

Pas denoncimit, autoritetet greke i kanë siguruar masa mbrojtëse, ndërsa policia po ndjek situatën për shkak të pretendimeve se ish-partneri vazhdon të tentojë kontaktin me të.

Rasti vjen vetëm disa orë pas një tjetër episodi të rëndë në të njëjtën zonë. Një 32-vjeçare dhe partneri i saj aktual u plagosën me thikë brenda banesës së tyre, ndërsa për sulmin dyshohet ish-partneri i gruas.

Sipas raportimeve, ndaj autorit të dyshuar të asaj ngjarjeje ishin bërë më herët pesë kallëzime, katër prej tyre për dhunë në familje. /noa.al