Një 23-vjeçare, e cila është në muajin e shtatë të shtatzënisë dhe ka një fëmijë 3 vjeç e gjysmë me ish-partnerin, është paraqitur në Komisariatin e Policisë së Lavrios dhe ka bërë kallëzim për dhunë në familje.

Sipas mediave greke, e reja ka denoncuar kërcënime dhe ngacmime të vazhdueshme nga ish-partneri, duke pretenduar se ai vazhdon të përpiqet t’i afrohet edhe pas ndarjes.

Incidenti më i fundit dyshohet se ka ndodhur në një kënd lojërash, ku ish-partneri i është afruar dhe e ka kërcënuar. Për shkak të tronditjes së fortë psikologjike, 23-vjeçarja është transportuar në spital, ku ka qëndruar nën kujdesin e mjekëve.

Pas kallëzimit, autoritetet greke i kanë vendosur masa mbrojtëse, ndërsa policia po monitoron situatën për shkak të pretendimeve se ish-partneri vazhdon të kërkojë kontakt me të.

Rasti vjen vetëm pak orë pas një tjetër ngjarjeje të rëndë në Lavrio, ku një 32-vjeçare dhe partneri i saj aktual u plagosën me thikë brenda banesës së tyre. Për sulmin dyshohet ish-partneri i gruas.

Sipas raportimeve, ndaj autorit të dyshuar të asaj ngjarjeje ishin bërë më herët pesë kallëzime, katër prej tyre për dhunë në familje.