LONDËR — Një bllok shënimesh me tekste këngësh të shkruara me dorë nga vokalisti i njohur i grupit Queen, Freddie Mercury, është vendosur në qendër të vëmendjes pasi u shit për 277 mijë paund në një ankand në Londër.

I organizuar nga shtëpia e ankandeve Propstore në kuadër të ngjarjes "Music Live", ky bllok shënimesh përbënte artikullin më të shtrenjtë të shitur gjatë ditës së parë. Tekstet u përkasin viteve të regjistrimit të albumit të tij të parë solo, "Mr. Bad Guy", të publikuar në vitin 1985.

Fletorja ishte pjesë e arkivit personal të producentit të njohur gjerman, Reinhold Mack, i cili ka dokumentuar bashkëpunimin dhe miqësinë e tij të ngushtë me Mercury-n gjatë punës në studiot Musicland në Mynih. Koleksioni i Mack përfshin më shumë se 80 objekte memorabilie që dolën për herë të parë në ankand.

Në të njëjtin event u shënuan edhe shitje të tjera me vlera të larta financiare:

Kitara e Noel Gallagher: Kitara akustike Takamine FP460SC, e përdorur gjatë performancës së Oasis në "MTV Unplugged" në vitin 1996, u shit për 226,800 paund, duke shënuar një rekord botëror për një kitarë akustike të këtij grupi.

Xhaketa e Michael Jackson: Xhaketa ushtarake në ngjyrë bardh e zi dhe ari, e veshur nga mbreti i popit gjatë periudhave të albumeve "Dangerous" dhe "HIStory", u shit po ashtu për 226,800 paund.

Pianoja Yamaha C3: Pianoja ku kanë luajtur emra të mëdhenj të muzikës si Freddie Mercury, Queen, Rolling Stones dhe Elton John u blerë për shumën 81,900 paund.