FIER — Këngëtari nga Fieri, Erind Xhaferaj, ka mbërritur në Gjykatën e Shkallës së Parë Fier për t’u njohur me masën e sigurisë.

Xhaferaj u prangos dy ditë më parë pas denoncimit dramatike nga vetë nxënëset e shkollës artistike "Jakov Xoxa".

Nxënëset njoftuan menjëherë policinë për veprimet e turpshme që i riu po kryente pranë perimetrit të institucionit arsimor.

Efektivët e policisë ndërhynë me urgjencë në terren duke bërë të mundur kapjen dhe shoqërimin e menjëhershëm të këngëtarit.

Gjyqtari Noel Veizi dhe prokurori Skerdi Sinanaj do të shqyrtojnë sot kërkesën për masën e sigurisë ndaj të arrestuarit.

Sipas burimeve nga Komisariati i Policisë Fier, kallëzimi është bërë nga një vajzë, e cila ka telefonuar sallën operative të Policisë.

Pas marrjes së informacionit, shërbimet e Komisariatit të Policisë Fier kanë kryer verifikimet në terren dhe kanë organizuar veprimet operacionale për dokumentimin e rastit.

Hetimet po vijojnë për zbardhjen e plotë të rrethanave të këtij incidenti të rëndë që tronditi nxënësit.